Minggu I Dung Trinitatis, 02 Juni 2024 Debata Do Nampuna Hagogoon Kekuatan Berasal Dari Allah 2 Korint 4: 5 – 12

 

1.      Patujolo

Adong do pandohan na mandok “fitnah lebih besar dari pembunuhan”, na marlapatan hata na so tutu gumogo do laho mambunu sasahalak. Hata na so tutu mambahen goar ni halak gabe marlaok (tercemar), jala on ma na ni dokna pembunuhan karakter (character assassination). Molo dung sanga sar barita naso tutu i, gabe godang ma na porsea tu hata na so tutu i. Jala halak na mambahen hata na so tutu i, godangan na marlate ni roha tu musuna, asa unang porsea halak tu musuna i. Songon i ma na ni adopan ni Apostel Paulus di huria Korint, na adong mandok ibana apostel na so tingkos (palsu). Gabe marlea ma apostel Paulus di angka halak na di Korint di hatia i.

 

Nang pe dibahen halak songon i tu Apostel Paulus, ndang gabe sumurut ibana laho mamaritahon Barita na Uli tu angka na so porsea di Jesus Kristus. Pos ni rohana tu Debata dibagasan parungkilon i, pola didok ibana “nunga putus hosanami ditimbangi rohanami; asa unang dirinami huhaposi hami, tung Debata do na manungguli angka naung mate. Saut do hami dipalua, laos paluaonNa do sian hamatean na sai jorbut i. Tu Ibana do manghirim rohanami, paluahonNa do na tu joloan on.”(2 Kor. 1: 9-10).

 

2.      Hatorangan ni Turpuk

Adong halak marjamita na gabe patuduhon halobian dirina, gabe lupa ibana na ingkon Tuhan i do na jamitahonna. Ido di ayat 5 di dok apostel Paulus, ia barita na binaritahon ni ibana ndang dirina alai Kristus Jesus do. Hadirion ni Kristus Jesus na Tuhan do binaritahonna, ala godang dope di tingki na so porsea ia Jesus ima Tuhan Anak ni Debata. Jala di posisihon apostel Paulus do dirina gabe naposo (Gorik, Doulos) ni Tuhan, lapatanna ndang lobi umsangap ibana sian Debata. Lapatan ni doulos di hata gorik ima hatoban, pangula na ulaonna di gaji na rendah. Jadi ndang gabe umbaritaan ibana sian Debata, di angka jamita na binaritahon ni ibana.

 

Tiur (terang) ringkot tu angka na dibagasan haholomon ala asa boi mardalan tudia na tinujuna. Songon na tarsurat di Jesaya 9:2 “Bangso na mardalani dibagasan haholomon marnida sada panondang na bolon. Binsar do sada panondang di angka na mangingani tano linggoman ni hamatena”. Panondang dison ima patuduhon Jesus Kristus na manondangi roha ni halak na dibagasan haholomon.

 

Apostel Paulus ndang halak na mura mandele mangadopi angka parungkilon na niadopanna, nang pe hamatean gabe ancamanna. Ido di dok ibana di ayat 7 Debata nampuna hagogoon, lapatanna Debata do na magogoihon ibana laho marbarita mamaritahon Barita na Uli. Dihilala ibana do hagogon ni Debata ima di tingki  marhaporsuhon alai ndang hapusohan; tarsosak alai ndada tarhapit; tarlele alai nda tung pinasombu. Pengalaman na sisongon on ma na mambahen apostel Paulus ndang mura mandele, sai na adong do solusi molo ro angka parungkilon di ngoluna. Jala hamamate ni Jesus do na gabe hangogolu ni ibana. na marlapatan marhite hamatemate Tuhan Jesus dapot ibana hagogoon laho manghatindangkon na adong haluaon sian Debata. Ai nunga dibagasan pamatangna do Tuhan Jesus jala nunga dipardanginghon ibana Hata ni Tuhan i na gabe hangoluan di ibana.

 

3.      Aplikasi

Adong do sahalak pandita na tarbarita ala parjamitahonna na mambahen godang halak sai olo mambege jamitana. Dipudian ni ari ala dibereng ibana godang membege jala las roha na mambege jamitana, gabe ro ma ginjang ni roha di ibana. ndang Debata be dijamitahon ibana alai dirina do dipaburnang-burnang. Di na sahali marsahit posa  ma ibana gabe ndang boi be marjamita, gabe dirimang-rimangi ibana do hasalaan ni ibana ima na dirina do dibaritahon dijamitana ndang Debata. Gabe manopoti dosa ma ibana tu Debata ala sala na ni ulana i. Sada parsiajaran do on tu angka parjamita, molo marjamita ingkon Debata do na binaritahon hagogoon dohot huasona ditonga-tonga ngolu ni jolma.

Godang do halak na mura mandele ala parungkilon na ro tu ibana isarana parsahiton, parhepengon, parkarejoan, parsaoran, dohot na asing. Jala ala ndang manahan ibana di parungkilon i gabe dilului hagogoon ni portibi na boi marbalik sian Debata. Isara ni halak na marsahit, alani posi ni parsahiton gabe laho mangalului pangobation tu hadatuon ala dibaritahon boi pamalumhon sahit na niaena. Manang alani persoalan perhepengon, rumah tangga gabe diputushon parsirangon. Manang ala soadong hepengna gabe diulahon manangko na boi di penjara. Sudena i naso sabar do jolma i mangadopi angka parungkilon i, jala hurang haporseaonna na margogo do Debata na boi mangurupi ibana mangadopi parungkilon i.

 

Boi do hita marsiajar sian pardalanan ni ngolu ni Apostel Paulus na tongtong hot di tiop ibana hagogoon ni Debata. Ndang mura mandele ibana alani parungkilon na ni adopan ni ibana. margogo do Debata mangurupi jala mangalehon dalan haruar angka na masa di ngolu ni jolma na porsea tu ibana. pos ni roha tu Debata i do na gabe sitioponta jala i do sibaritahonnonta tu sude halak. Songon pandok ni par Psalmen “Pasahat ma dalanmu tu Jahowa jala haposi Ibana, asa ibana paturehon (Psalm 37:5)”. Amin