Minggu II Dung Trinitatis, 09 Juni 2024 Dipargogoi Jahowa do NaposoNa
1 Samuel 8: 4-11
1. Patujolo
Umpama ni halak batak
mandok: Sai nirimpu parhunihan hape pargadongan, Sai nirimpu parsaulian, hape
hamagoan”. Dang adong natuatua menginginkan kegagalan ni angka ianakhon di
bagasan pardalanan ni ngoluna, jala godang do natuatua manghalomohon ianakhon
asa gabe generasi penerus di tongatong ni angka ulaon. Jala na baru do pe hita
manaringoti taringot tu politik dinasti, jala godang do menolak jala godang
muse do na mangolophon molo mampu. Laos ido na tabereng di turpuk on, na
dipabangkit si Samuel do ianakahonna, ima si Yoel dohot Abia na gabe panguhum
di Israel, songon panggantina dung matua ibana. Alai marnida parange dohot
sikap ni si Yoel dohot Abia dang apala dos jala ndang mangihuthon jejak ni si Samuel (8:1-3). Pangalaho na mansai
tandi ima, parlabaan gabe prioritas di ulaon ni nasida, gabe sega ma
hasintongan Alani manggulut parlabaan. Marnida sikap nasida i, gabe dang
tarjalo ni bangso i, gabe di suarahon angka natuatua ni Israel do asa tung
diangkat si Samuel raja na asing di nasida. Laos ima turpuk on.
2. Hatorangan ni Turpuk
Ayat 4-6 Pangidoan
Raja na asing. Marpungu do angka natuatua ni Israel, laho
menanggapi na masa hatiha i, ima na so tarjalo nasida pangalaho ni angka
ianakhon ni si Samuel na uasan di angka parlabaan. Gabe sahata do nasida
mangido asa dipangkit si Samuel raja na asing di nasida. Jala di sisi na asing,
dang tarjalo nasida sikap ni si Samuel na pabangkit anakna gabe panguhum di
nasida, ala dang uli pangalahona. Dipatupa ibana do politik dinasti na so hea
masa di luat na asing, na di rajumi ingkon dipabangkit raja na asing di nasida.
Sihol do roha ni natuatua ingkon boi si Samuel patupa politik na stabil di
bangso, jala menghindari pewarisan harajaon na so ture. Molo taida sikap ni
Samuel manangihon pangidoan ni natuatua
Israel, maol do tarjalo ibana, ala dang apala dihalomohon ibana
kepemimpinan ni ianakhon nai. Manjanghon sisongoni, dipataridahon ibana do
sikapna songon naposo ni Debta, na sai tongtong sihol rohana di sangkap ni
Debata laho manjadihon jolma i tudos rupa ni Debata.
Ayat
7-11 Tagiang ni si Samuel tu Debata. Mangadopi na
ronson na masa di bangso Israel na niadopan ni ibana, martangiang do ibana tu
Debata, na patandahon halak na sai tongtong marhaposan tu Debata. Jala dang
tagam ibana di alus ni Debata na mandok: Tangihon ma soara ni bangso i, ai
ndada ho, ahu do na binolongkon nasida, asa unang be Au Raja Nasida”. Molo
taida ayat on, naeng tangkas diondolhon, asa harajaon Israel ima na bersifat teokrasi (Debata na manguluhon
Bangso i manang gabe Raja). Teokrasi
na digambarhonna ima Debata pabangkit raja nasida marhite na dimiahi. Alai
pangidaoan ni bangso Israel ima monarkhi,
naeng ma naek jabatan sude angka raja ni Israel ala ni keturunan,ndada na
pinillit ni Debata. Maol do nian ulahonon ni si Samuel pangidoan ni bangso
Israel i, alai parbue ni tangiang ni ibana ima di alus ni Debata ima na
pabotohon uhum ni raja na gumonggom nasida sogot. Laos ido hagogoon di
Samuel,ima manghatahon tona taringot tu uhum sijaloon nasida, buatonna do angka
anakmuna… (ay. 11). Hagogoon ni si Samuel ima molo hot ibana dibagasan tona ni
Debata, jala disi do tarida parsitutuanna mangadopi angka hamaolon di ganup
parngoluanna.
3. Hahonaan na tu jamita
a.
Godang do na taadopi dibagasan persoalan ni
ngolunta sinuaeng on, boi do i taida di angka ragam ni namasa di tongatonga ni
ngolunta. Boi do ro persoalan i sian tongatonga ni dirinta dohot sian luar ni
dirinta be. Alai gumodang do persoalan dan beban itu ro alani angka hagiot
dohot keinginan diri sendiri. Ai godang angka na masa dingolu on dang sadalan
dohot na dibagasan pingkiranta, gabe tabaen do i gabe beban dibagasan ngolunta.
Turpuk on mamboan hita, boha do mangantusi na masa di ngolu on songon sada
proses perjalanan dibagasan ngolunta. Molo pe dang pas angka na masa dingolu on
tu na dibagasan pingkiranta, alai boha do bahenonta pahothon rohanta laos ima
dalanta marpos ni roha di sangkap ni Debata. Antong ingkon tubu ma pos ni roha
asa sangkap ni Debata ma na tulus.
b.
Di partingkian nuaeng on nunga godang na lomos hita di angka pangidoanta tu Debata,
ala jotjot do mamaksahon kehendakta hita di angka pangidoan. Tapangido do nian
sipangidoanta tu Debata, alai jumolo do hita mansurasura alus ni Debata, gabe
boi hita kecewa di angka pangidoanta. Marhite turpuk on lam mananda ma nian
hita dihuaso dohot gogo ni Debata mangaturhon saluhut na tapangido tu Ibana.
c.
Naposo ni Debata naeng hot dibagasan
pamiliton ni Debata. Asa unang tubu ganggu ni roha di pamilliton ni Debata di
angka naposoNa. Modal dohot hagogoon ni Naposo ni Debata ima hata ni ni Debata.
jala ido tona na nilehon ni Debata di ganup angka naposo naung dimiahi Debata.
Jala ingkon tubu ma pos ni roha, ai dipargogoi Debata do angka naposoNa laho
mangulahon ulaon panghobasion, molo dibagasan parsitutuon tu Debata.
