Khotbah Minggu 19 Mei 2024

 

I.          Patujolo

Godang do halak molo manaringoti Pentakosta, sai na marhata na leban (bahasa Roh) na dihatai, hape sasintongna na diondolhon di ari Pentakosta ima ulaon zending manang ulaon marbarita nauli tu saluhut jolma di portibion. Ido didok Jesus di Ul.1:8 “alai jaloon muna do hagogoon ni Tondi Parbadia na songgop tu hamu, gabe sitindangingKu ma hamu di Jerusalem dohot di sandok Judea dohot di Samaria, sahat ro di ujung ni tano on.” Didok muse di Joh. 15:26 “Asa ro ma pangondian i sisuruonHu sian Ama i tu hamu, i ma Tondi hasintongan i, na borhat sian Damang, i do na manghatindanghon taringot tu Ahu”. Ima napatuduhon molo dilehon Debata Tondi Parbadia tu huriaNa, naeng taridama marhite hamajuon ulaon namarbarita nauli asa lam martamba bilangan ni angka na porsea di Jesus Kristus.

II.       Hatorangan ni Turpuk

Taida ma namasa di Jerusalem na digorithon di turpuk on andul do tu na masa di padan na robi taringot tu tungkup (menara) di Babel (1 Musa 11:1-9). Di na muruk Debata gabe dipasirang panghuling ni jolma hatiha i ala haginjangon ni roha ni nasida. Alai baliksa do namasa di haroro ni Tondi Parbadia gabe dipasada ma angka bangso sian marragam panghuling di bagasan Jesus laho manomba Debata. Ulaon ni Tondi Parbadia ma na pasadahon sude halak naro sian marragam inganan tu Jerusalem, adong na ro sian Partia, Media, Elamit, Mesopotamia, Judea, Kappadosia, Pontus, Asia, Prigia, Pampilia, Misir, Libia, Rom, Jahudi, Kreta, Arab. Gabe boi nasida sude marsada ni roha mamuji Debata di Jerusalem (Ay. 47) nang pe berbeda latarbelakang tradisi-budaya nasida. Boasa boi marsada nasida? Ala ulaon ni Tondi Parbadia menembus batas-batas adat-budaya-tradisi ni hajolmaon. Songon Jesus Kristus na marsada dohot Debata AmaNa i, songon i ma ulaon ni Tondi Parbadia pasadahon sude angka na porsea di Jesus. Marsada do angka jolma sian inganan na marragam marpungu di Jerusalem mamuji Debata, marende dohot martangiang. Holong na sian Debata do nabinoan ni Tondi Parbadia tu sude jolma rap dohot angka sisean ni Kristus na marpungu di Jerusalem hatiha i umbahen na marsada nasida mamuji Debata.

Molo didok ulaon ni Tondi Parbadia napasadahon angka na porsea di Jesus Kristus, na marlapatan ndang ulaon ni Tondi Parbadia laho memolamola angka halak Kristen. Alani molo tubu angka parbolatbolaton di huria, ndang ulaon ni Tondi Parbadia i. Ulaon ni tondi nahodar do anggo i. Huria na sinonggopan ni Tondi Parbadia, ima huria na tongtong manjaga hasadaon ni huria, saroha, sapingkiran parhalado nang ruas mangulahon hasintongan dohot hatigoran na hombar tu lomo ni roha ni Debata, ndang na hombar tu lomo ni rohanta. Namangihut, ulaon ni Tondi Parbadia ima laho paimbaru dohot papitahon ngolunta siganup ari. Dila ni api na marjillamjillam gabe sada tanda na manggombarhon ulaon ni Tondi Parbadia na paiashon rohanta nang pingkiranta asa bolong sude angka na ramun, angka na roa sian dirinta. Molo disonggopi Tondi Parbadia do hita, tontu tarida ma i marhite parangenta siganup ari dohot parbueni tondi i di ngolunta (Gal. 5:22).

III.    Panimpuli/Sipahusorhusoron

Godang do ulaon Tondi Parbadia na boi tapataridahon di ngolunta siganup ari, na gabe panindangionta songon barita nauli tu humaliangta. Ima ulaon na manghaholongi Debata nang dongan jolma. Mangulahon hasintongan dohot hatihoran, manjaga habadiaon ni ngolunta, ndang taulahon be angka ulaon na mangaramuni ngolunta. Sai adong do halak naso marlomoniroha tu hita molo taulahon ulaon ni Tondi Parbadia, songon namasa di turpuk on adong na manginsahi angka sisean i nang angka na marpungu di si mamuji Debata. Olo do sipata hita diinsahi, dimusuhi, direhei, diparengkeli, difitnah, manang gabe hasosogo gariada dipalao molo taulahon ulaon na denggan dohot hatigoran, ala ndang lomo rohani sibolis i molo taulahon lomo ni roha ni Debata. Alai taingot ma unang gabe sumurut manang gabe mabiar laho mangulahon hata ni Debata, ai didok Tuhanta Jesus do di Mat.28:20 “ai ida ma, sai na dongananHu do hamu rasirasa ro ajalni hasiangan on.” Amen.