JAMITA MINGGU 6 DUNG TRINITATIS, 7 JULI - Mundosaragi

 

DEBATA DO PANGONDINGANTA

2 KORINT 12 : 2 – 10

I.            PATUJOLO

Di sada tingki, adong ma sahalak pandita marjamita di sada huria. Didok pandita i ma sian jamitana songonon: “Aut sugari dang na godang angka parungkilon na huadopi di pardalanan ni ngoluon, ra nuaeng nunga gabe sahalak pandita na ginjang roha au. Alai, huhamauliatehon ma tu Tuhan i, ai dipaloas Tuhan i do masa angka sitaonon na dokdok on tu ahu, ido umbahen serep rohangku, jala tongtong do au pasahathon ngolungku tu Tuhan i sian nasa rohangku.” Ima ninna pandita i. Memang, boi idaon songon na denggan do nian panghobasion ni pandita i di angka huria na nihobasanna, godang angka prestasina. Boi doi dihaginjangkon rohana i nian. Alai dipalua Debata do ibana sian ginjang ni roha i marhite angka na masa di ngolunai.

 

II.                HATORANGAN

Di turpuk jamita on pe boi do tangkas idaonta, sasintongna godang do pengalaman rohani dohot angka pangungkapon na sian Tuhani tu apostel Paulus na boi mambahen ginjang rohaNa. Boi do sasintongna dipujipuji ibana dirina di angka jamitana, ala ni sude angka haulion naung ni alaman na rap dohot Tuhan i. Alai dang i na rumingkot di rohana, asa molo tung pe dibaritahon ibana pengalaman rohani i tu na asing, naeng ma nian Tuhan i ma na marsangap disi, dang sebalikna. Naeng tongtong tangkas begeon jala botoon ni halak, Debata do na mangondingi ibana. Mansai kontras do na diulahon ni apostel i tu na masa di partingkian i. Ai masa do di hatiha i angka “kesombongan rohani” dipatuduhon angka parjamita na asing. Alai, dang songoni di roha ni apostel Paulus, justru maila do ibana sasintongna paboaboahon angka pengalaman rohani i molo tung gabe tu ginjang ni roha do.

Di dok do di ayat 2 – 6 i “Di bagasan Kristus hutanda sada jolma: Nunga sampuluopat taon salpuna, tarhinsat halak i ro di lampis patoluhon ni banua ginjang i...” Pandohan on sasintongna martudutudu tu Apostel Paulus do, ima di na pajumpang ibana dohot Jesus di pardalanan laho tu Damaskus. Disi tangkas do diida ibana do Jesus na nihasogohonna i. Jala mapitung do simalolong ni pardagingonna i asa tangkas diida ibana Jesus i marhite mata ni partondionna. Disi ma parjumpangan na luar biasa na paubahon rohana sian silele Jesus gabe siihuthon Jesus. Pandohan “nunga sampulu opat taon salpuna” patuduhon hatutuon ni tingki (keotentikan waktu), jala tutu do i masa sampulu opat taon andorang so disurathon ibana surat 2 Korint on. Tarida do sian hatorangan on, dang na mengada-ada apostel i di panindangionna i. Jala pandohan “tarhinsat halak i ro di lampis patoluhon ni banua ginjang i” boi do talapati songon gombaran ni kesempurnaan ni banua ginjangi, ima inganan ni Debata, jala tusi do ibana tarhinsat uju i. Dungi diulahi do muse mandok di ayat 3 “Asa na hutanda do jolma i” na marlapatan tutu do masa di ibana jala ido na binaritahonsa i, dang na turiturian manang ninna tu ninna rupani, alai sintong do masa i di ibana ala ibana do sasintongna na nihatahonna disi. Dungi, adong dua hali pandohan : “Manang na dibagasan dagingna ibana ujui, manang sirang sian dagingna, ndang huboto; Debata do umbotosa.” (Ayat 2b, 3b) Pandohan on patuduhon keterbatasanna songon sahalak jolma, laos disisi na asing naeng patuduonna kesempurnaan ni Debata na umboto saluhutna. Di ayat 5 – 6, naeng dohononna, molo pe ingkon hatahononna i dang na laho patimbohon dirina ibana disi, alai naeng idaon ni halak ma hasangapon ni Debata marhite ngoluna.

Di ayat 7 – 10, dipatorang apostel Paulus do na masa parungkilon di ngoluna, marhite pandohan : “Hona basirbasir do ahu di sibukku, ima suruan ni sibolis na mamukpuhi ahu, asa unang hupatimbo diringku” Boi antusanta, sada parungkilon bolon do on di ngolu

panghobasionna. Alai nang pe songoni, tangkas do ditanda ibana, dipaloas Debata pe masa i di ngoluna, asa unang ginjang rohana di angka pangungkapon na sumurung na nijalona sian Debata i (Ayat 7a). Pola do tolu hali dipangido ibana sian Tuhan i asa dibolongkon i sian ibana, alai laos disi do naeng tandaonna dalan ni Debata doi asa tongtong serep rohana, jala asa tongtong mangunsande ibana tu Tuhan i sian nasa rohana. Marhagogoon ma ibana di parungkilonna i, jala las ma rohana ai tangkas do ditanda ibana Debata do na mangondingi ibana saleleng ngoluna.

 

III.             PENIMPULI

Ragam do pencapaianta di ngolu on na boi mambahen ginjang rohanta, alai naeng ma nian angka kelebihan, pencapaian dohot sude tahe angka prestasinta i, di ngolu siganup ari bahkan di ngolu partondionta tapangke laho pasangaphon Debata. Unang ma adong terselip ginjang ni roha di hita. Ai sian Debata do haroroan ni sudena i. Molo tung pe ingkon paboaonta angka keberhasilanta i, naeng ma nian martujuan asa sangap Debata marhite ngolunta, unang gabe mambahen ginjang rohanta.

Di sisi na asing, dipaloas Tuhan i do songgop angka “basirbasir” di ngolunta on, asa tongtong do hita manguncande tu Debata. Asa benget rohanta molo tung pe masa angka hamaolon, parsahiton, dohot angka parungkilon di ngolu on, asa tongtong taongkui di balik ni angka kesuksesan i, jolma na gale do hita, asa marhite panandaonta di dirinta i nian mangolu hita dibagasan serep dohot unduk ni roha i, jala asa tontong hita mangunsande tu Ibana sian nasa rohanta di saluhut gulmit ni ngolunta. Molo tung pe masa angka hamaolon i, tarajumi ma, cara ni Debata doi laho mangondingi hita sian ginjang ni roha i na nanait hita tu bagasan dosa. Antong tadok ma mauliate tu Tuhanta na tongtong mangondingi hita di ngolunta.