Khotbah Barani Mandok Hasintongan Minggu 14 Juli 2024
Amos 7 : 1 – 6
I. PATUJOLO
Panurirang Amos, sahalak parmahan birubiru sian Tekoa, Juda
(Israel Selatan) na jinou ni Debata laho manurirangi saluhut halak Israel
ro di angka raja di hatiha i. Nang pe tubu di huta Juda si Amos, disuru Debata do ibana
manurirangi tu huta Israel (Utara). Israel di bidang politik dohot ekonomi
mansai maju jala maduma. Alai hamoraon di arta ndang sadalan dohot hamoraon ni
partondion di nasida. Dipataridahon nasida
do nian angka praktek-praktek parugamoon, alai holan formalitas
sambing doi. Dipatupa bangso i do nian angka parsombaonna tu Debata, dipatupa
do angka pelean songon na niajarhon ni angka malim jala dipasahat nasida do
angka peleanna tu bagasa joro. Alai laos udut do tong nasida mangula angka na jat jala namaralo tu lomo roha ni Tuhan
i.
Disomba nasida do angka ganaganaan, angka namora pagosagosa angka napogos jala
diparhatoban. Dihilala bangso i do, ia angka hadumaon na ro tu nasida alani
ringgasna na mangihuthon angka hasomalon ni parugamoon dohot alani angka parbinotoan ni
nasida sambing do. dietong rohanasida do boi Debata disogok marhite angka
pelean dohot hasomalon sambing. Masa ma di nasida kesombongan rohani. Alani on
do umbahen na dijou Debata panurirang Amos on. Diida Debata do ia si Amos
sahalak parmahan na satia, jujur jala ndang mabiar laho mambaritahono angka
hasintongan.
II.
HATORANGAN NI TURPUK
Tangkas do didok
Debata, ia angka ari raya na pinatupa
ni bangso i mambahen magigi
Debata jala ndang dihalomohon roha ini Debata. Suang songoni nang angka
pelean ni nasida, dan lomo roha ni Debata
jala ndang parduli
Ibana disi (Am. 5 : 21
– 22). Ai saluhut nai dipatupa nasida holan
laho paburnangburnang dirina be do. Idaon tama do nasida di angka penampilan
parduru, alai ramun di roha parbagasan. Parsuruon ini Debata tu si Amos asa
nalnal do patolhasonna angka habusukon na mian di saluhut
bangso i. Naeng nian rajuman
ni nasida angka pangalahona be naung
maralo tu lomo roha ni Tuhan i. Ulaon na mansai borat do nian on di si Amos
jala balga risiko siadopanna. Alai ala Debata do namarsuru jala na mamparbohali
ibana, hibul do rohana borhat sian hutana laho tu Juda.
Dipataridahon Debata do tu panurirang Amon angka parnidaan
(Penglihatan) na gabe sada gambaran na naeng masa tu tongatonga ni bangso i
molo so adong hamubaon ni roha di nasida. Hata
na binoanna i ndada holan tu angka jolma biasa, alai sahat
tu raja panggomgomi uju i. Mansai gomos do disoarahon si Amos asa
marhamubaon ni roha nasida saluhutna, asa malua nasida sian paruhuman na naeng loason
ni Debata masa tu nasida.
Alai ala dihilala
bangso i nunga be diulahon nasida angka hasomalon ni
parugamoon i, ndang tarjalo nasida molo gabe uhumon ni Debata nasida. Ndang be
dirajumi rohanasida naung salah jala maralo angka pangalahona i di adopan ini
Tuhan i.
Diboto si Amos do na gabe sisogo nama ibana di angka donganna
panurirang nang di angka malim ala
barani ibana mansoarahon hasintongan
na marharoroan sian Tuhan i. Alai
ala dirajumi ibana do, na sinuru ini Debata do ibana, ingkon sahat do barita i
songon na pinangido ini Debata. Sai songon na leas do roha ni angka natorop i
umbege angka pandohan ni si Amos i, ai dihilala nasida tung so adong do dalanna
gabe leksehonon ini Debata nasida hinorhon ini haringgason ni nasida namarugamo
i. On do sada hasalaan na so dirajum nasida, torop jolma marugamo, alai ndang marTuhan.
Ro nasida marsaor
tu bagas joro, alai ndang saor nasida tu Tuhan i, ujungna
gabe sai dietong nasida ma nga sintong jala badia nasida di adopan ini
Debata, hape hagigion do saluhutna i di Tuhan i. Na ringkot
di Tuhan i ndada formalitas ibadah, alai parsaoran
na rosu dohot
Tuhan,
ido na dihalomohon Tuhanta. Tarida mai sian halindangon (ketulusan) mangoloi
jala mangulahon hata ini Tuhan i. Alai andul
do marimbar pangantusion ni jolma i sian na pinangido ni Tuhan i. dibahen i, ingkon uhuman nama
na tuk laho pasodarhon nasida di angka bangko na so suman i.
Barani do panurirang Amos menerobos angka harbangan
kemunafikan, menerobos angka pangalaho holong na marpambuat tu raja. Ro di angka sintua ini malim na sai mangampini raja ala mangula dosa tong do dipaingot si Amos
marhite angka hata na mansai
koras. Angka malim naung
manjalo tohonan laho mambaritahon hata ni Debata, na ingkon paingothon ganup
jolma molo mangula na jat, gabe
jolma na hosuk tu angka sinamot. Ndang
be hasintongan di soarahon, alai na
sintong di raja i nama di undukhon nasida, asal ma sonang roha ini raja i.
Disoarahon si Amos do tu bangso i angka napinataridahon ini Debata tu ibana. Dipataridahon Debata do tu ibana angka
sihapor na jinadihon ini Debata pasuda angka suansuanan ni nasida. Bangso i
nunga mandai parbue ni angka nasinuanna sian tano na napu, alai pasudaon ini
sihapor nasinuru ni Debata i ma saluhutna tagan so sanga dope ditapu (panen).
Ingkon mangangguki nasida manjou Tuhan i dung masa hata ondeng. Suang songoni
nang api na pinio ini Jahowa laho manoru i dohot pasudahon nasa na adong di
nasida. Patupaon ini Debata mai laho pataridahon habalgaon ini huasoNa, asa
manolsoli bangso i di angka dosa na niulana ganup ari. Songoni ma angka hata na nilumbahon ini panurirang Amos tu
bangso i asa humatop nasida marhamubaon
ni roha, andorang so ro dope rimas ni Tuhan i. Molo olo
nasida mangalumbahon hamubaon ni roha
i jala ro Tuhan Debata mangido hasesaan ni dosa, sai na marpangulahi do roha ni
Debata marnida bangso na hinaholonganNa i. Ima parnidaan na pinapatar ini
Debata tu si Amos asa adong nian sosososo di bangso
i. Ai ndang ditulak Debata
angka jolma na olo manopoti
dosana mardongan ias ni roha, alai hot do uhuman i di angka na sai margolgol di dosana, lumobi
jolma na sai mangarajumi
nunga badia ibana, hape ramun dope di adopan ni Tuhan i.
III. SIPAHUSORHUSORON
1.
Molo marnida hita di jaman nuaeng
on, tong dope torop jolma i na sai kompromi tu angka dosa, torop dope na mangaramuji dirina
umbadiaan sian donganna
na asing. Laos alani i gabe
so olo be tumangihon angka hata sipaingot ala di hilala rohana nunga ringgas
ibana ro tu angka parmingguon nang ulaon parsaoran na asing. Ringkot
do antusanta, haroronta di sada punguan ndada
laho paburnangburnang diri, alai dalan doi laho pataridahon holong na sintong. Sintong ma hita, alai unang merasa na
sumintong sian dongan na asing.
2.
Molo adong angka na humurang,
lumobi na maralo tu hata ni Tuhan i, ingkon barani do hita manosoi asa marhamubaon, alai ingkon ma nian hita pe ndang mangulahon hasalaa
nasarupa asa marhuaso hatanta
i laho paubahon dongan. Apoi ma angka jolma na madabu tu dosa, jala unang marpilipili hita. Unang ma hita
marnida bohi laho manghatahon hasintongan, ai hasintongan i ingkon ganup jo
jolma manghangoluhonsa. Nang pe parpangkat, adong huasona, alai molo salah jala adong parhiteanta laho mangapoi, taapoi
ma. Molo so boi taapoi, taboan ma di tangiangta asa Tondi
Parbadia ma na mangapoi jala paingothon ibana.
