KHOTBAH MINGGU 10 DUNG TRINITATIS, 4 AGUSTUS 2024

I.                   Patujolo

Nunga tung masai godang dipatupa Jesus angka tanda halongangan nang pangajarion taringot tu Debata, alai tung mansai godang dope angka na maol porsea, bahkan gabe tong godang na marsogo ni roha marnida Jesus alani sude na niulahonNa i. Ai godang an do nasida holan na tabo marnida, tabo manghilalahon, jala sae do holan na tarhalongang di sude na binahen ni Jesus i. Tarlumobi ma na taida di ayat andorang so turpuk jamita on, di dilehon Jesus mangan lima ribu halak marhite sian lima roti dohot dua ikkan, laos lobi dope 12 ampang. Laos sian on do marbonsir pandohan ni Jesus di turpukon nang angka sungkun-sungkun sian angka na torop i na mangalului Jesus i. Diantusi Jesus do songon dia angka roha ni jolma na ro mandapothon Ibana i. Nang pe marbuni dibagasan pamangan na manghatindanghon Jesus i, alai diida Jesus do songon dia sintong ni roha ni saluhutna jolmai.

Alai nang pe songoni sai ndang marnaloja Jesus patoranghon hata hasintongan i tu nasida, ima hata ni Debata i. Sai tongtong do diajari nasida, asa anggiat nian tung olo nasida porsea jaladiantusi nasida songon dia do sangkap ni Debata ta sandok jolma i. Dipatorang Jesus do angka dia ma sibahenon ni jolma i dingoluna.

 

II.                Hatorangan Ni Turpuk

Ayat 23 – 24 : sai lulu-lulu do nasida di Tuhan Jesus, jala ndang lomo roha ni nasida dao sian Jesus, jala naeng pabangkiton ni nasida Jesus gabe “raja” di nasida. Adong na ringkot siidaonta sian na niula jala na ni harohaon ni na torop i. Ganup ari do diparateatehon nasida Jesus, asa unang sanga lao. Sude di jagahon nasida. Umbahen ido gabe tubu pandohan:”Guru, sadihari do Ho ro tuson?”.

Ayat 25 – 29: hatop manang leleng ingkon jumpangan do jolma i na mangalului Jesus i. Nang mamolus sunge nang laut i, nang angka na asing, alai jumpangan do nasida. Nang pe diujungna na so tulus rohana manang ndang ala ni hasintongan i umbahen na dilului nasida Jesus. Marragam do nuaeng na masa i, nunga godang halak Kristen na sai holan tusan tuson mangalului godang jamita na tabo begeon, nang angka tangiang na didok roha nasida denggan di nasida. Alai nang pe songoni roha ni na torop i, tongtong do rade Tuhan Jesus manjanghon jala mangajari nasida.

Ayat 30 – 31: Sada pertanyaan alai huhut do on sada pernyataan hasintongan ni hata ni Tuhan Jesus na tu nasida, bahwa na sintong do nasida na mangihuthon Jesus holan ala ni angka tanda nang dohot naung dapotan sipanganon nasida sian Jesus. Umbahen ido pola sahat dipatorang nasida taringot tu na jinalo ni ompu ni nasida na jolo ditingki dipardalanan sian parhatobanan Misir. Ai didok roha nasida, ompu nasida boi do mangolu ala dilehon sipanganon i, nang nasida pe boi do mangolu ala dilehon sipanganon i.

Ayat 32: alai ndang diantusi nasida na didoknai, ai sian angka parbaritaan jala sian pangantusion ni hajolmaon, si Musa do na umbalga di nasida jala ido na mangalehon sipanganon i. Hape ndang diboto nasida, na umbalga dope Jesus sian si Musa. Ala ni ido umbahen na dipatorang Jesus, asa sintong pangantusion ni nasida taringot tu sipanganon na jinalo ni ompu nasida i na tongtong do Debata mangalehon, na manarihon ompu ni nasida i. Boasa pola dipatorang Jesus i, asa mangantusi nasida, bahwa sandok na adong na diportibion nasian Debata doi.

Ayat 33: Lam bagas muse dilehon Jesus pangantusion i, ai dibagasan hadirion ni Jesus ido roti i, ai Ibana do na sinuru ni AmanNa tu portibion, asa porsea jolma i di Debata, jala asa dapotan

hangoluan angka na porsea i. Debata mangalehon ndada holan sipanganon pardagingon i, alai dao umbalga sian i, disarihon Debata do hangoluan ni partondion, hangoluan sogot di banuaginjang.

Ayat 34: Maol dope tong dapot roha ni na torop i pandohan ni Jesus. Nang pe dipatorang Jesus, alai pangantusion ni nasida, sai tong dope tu na ringkot dipardagingon i, ima roti sipanganon, dalan hangoluan na diportibion.

Ayat 35: Ahu do roti hangoluan, ninna Tuhan Jesus. Adong do hata on beracuan tu na olo Jesus pasahat dagingna tu hamatean, asa dapotan hangoluan jolma angka na olo porsea manghaporsea i hamamateNa, haheheonNa, sahat tu na manaek tu banua ginjang Jesus. Ai ise angka na mangihuthon jala manghaporsea Jesus, dapotan ibana dipanghopkop ni Jesus i. Sian ido dalan ni jolmai dapotan hangoluan i.

 

III.             Hahonaan

1.    Diboto Jesus do sandok rohanta be na ro mangihuthon Ibana. Ndang tartabunihon jolmai songon dia do motivasi manang roha ni jolma i na mandok dirina “Kristen” si ihuthon Kristus i

2.    Hea do pe ringkot di rohanta na mangalului Jesus songon nasida na sai mamparrohaon gerak- gerik ni Jesus asa unang sanga dao Jesus i sian nasida. Hita do tarohaon na masa di pambahenan ni Tuhan di humaliang hita, di halak nang dibagasan ngolunta sandiri?

3.    Dinaro hita mandapothon Jesus, ingkon tasadari do dirinta ganup, unang tagabusi dirinta sandiri diadopan ni Tuhan i, asa nang Jesus i pe, olo jala denggan hita diangkupi

4.    Dang na disalohon Jesus angka jolmana mangharingothon ngolu pardagingon manang na mangalului dalan hangoluan diportibion, alai na dipangido ni Jesus, ditingki hita mangulahon i, manang mangalului dalan ni hangoluan diportibion, taingot ibana, jala taulahon ma i hombar tu lomo ni roha ni Tuhan i. Ai disi arta ta disi do rohanta.

5.    Tanda jala boto ma sandok na adong na di hita i. Ise do mangalehon i.

6.    Panghilalahon ma jumolo naung songon dia do di bahen Debata dingolum sahat rodi sadarion

7.    Tahaporseai ma hata i, “sandok na so male be manang ise, naung ro tu Ahu; jala na so tupa be

mauas manang ise, na porsea di Ahu”.

8.    Antong unang holsohon ngolumi, dapothon ma Jesus jala haporseai, asa mangolu hita diportibion, jala dapot hasonangan tondinta....... Amen !!!