KHOTBAH MINGGU 18 AGUSTUS 2024
MANGAMBOLOKON HAOTOON JALA MANGEAHI DALAN PANGANTUSION
(JOHANNES 6 : 51 – 56)
I. PATUJOLO
Tung apala maol tarjalo hita jolma manisia, molo adong di
tongatonganta na mandok dirina gabe anak ni Debata ia ibana. Ala sian
pardagingon tung apala tangkas do ia panandaion ni torop halak, ise na tumubuhon (situatuana/natorasna). Laos
songon i ma nang hadirion ni Tuhan Jesus, tung godang na manghasogohon hataNa, jala na mandok dirina:
Ahu do roti hangoluan, na tuat sian Banua Ginjang (Joh.6:51), pola gabe manghorhon ungut-ungut i di angka halak Jahudi (bnd.ayt.41). Sae gabe hira parsalisian na
tung apala borat idaon adopan ni
angka natorop i. Hape Tuhan Jesus, mandok hataNa asa adong do nian pos ni roha
jala asa taruli di hangoluan na pinatupaNa i. Huria na hinaholongan ni Tuhanta
Jesus Kristus! Di buku Johannes
on, adong 7 istilah na dipangke Tuhan Jesus laho manggombarhon diriNa
sandiri songon Anak ni Debata,
Sipalua jala Sipangolu i. Digoari do i “Ego
eimi” (Akulah) i ma: Roti hangoluan (Joh 6 : 35); Panondang ni portibi on (Joh.
8 : 12); Pintu i (Joh. 10 : 9); Parmahan
na denggan (Joh. 10 : 14); Haheheon
dohot Hangoluan (Joh. 11 : 25);
Dalan na pinatupaNa i, hasintongan dohot hangoluan (Joh. 14 : 6); Hau anggur na tutu (Joh. 15 : 1).
Saluhutna martudutudu tu hadirion ni Tuhan Jesus na mamboan
hangoluan tu angka na porsea jala
na ro tu Ibana. Hombar tusi do pangajarionNa taringot
tu Roti hangoluan na pinasahatNa tu angka na torop di
huta Kapernaum. Manang ise na manganhon jala manginum mudarNa i, i do
pahehehonNa di ari parpudi i. Pola gumodang partingkianNa laho mangajari dohot
pasahathon barita na uli di Kapernaum on, gabe digoari ma huta i marhite
istilah “Kapernaum Huta ni Jesus Kristus” (Kapernaum the Town of Jesus).
II.
HATORANGAN
Ay. 51 – 55: Jesus Kristus do Roti hangoluan sian banua
ginjang na mamboan hangoluan salelenglelengna. Panghantindanghonon ni Jesus taringot
tu Ibana do Roti hangoluan na tuat sian banua
ginjang, gabe mambahen
marsual angka halak Jahudi. Didok rohanasida:
Beha ma bahenon ni halak on mangalehon dagingNa i panganon ni jolma? Tung pamingkirion sian hajolmaon dohot
haportibion do ianggo di roha ni halak Jahudi i (ndang adong haporseaon manang posniroha nasida di Ibana). Holang do ia Jahudi i
di partondion nasida na marTuhan i Ndang dapot rohanasida pangajarion ni Tuhan Jesus disi. Ai tung
lalap do nasida
di sipanganon na olo
salpu i rupani
ima na sae mian di roha ni
halak Jahudi, i ma na dilului angka na torop i. Nda di parningotan nasida, ia
si Musa mangalehon tu ompunasida roti na sian
banua ginjang, i ma mangan Manna do ompunasida di parhorsihan, alai
Debata do mangalehon Roti na tutu sian banua ginjang, i ma AnakNa sandiri,
Jesus Kristus, gabe Sipalua jala Sipangolu di angka na porsea. Songon
i do muse hata ni Tuhan Jesus laho mangalusi sungkunsungkun ni
angka siseanNa: Tung situtu do na hudok on tu hamu, dilului hamu pe Ahu, ndada
ala naung dapot rohamuna tanda i, tung ala ni na bosur i do hamu mangan roti i
(ay. 26).
Manat do ia Tuhan Jesus laho patubegehon hataNa, asa naeng
nian malo jala mangantusi natorop di hataNa.
Hape balik do ia na masa, dung di dok Jesus hataNa
tu nasida, bahkan
di anggap Tuhan Jesus naung
lalaen (sakit jiwa), ala holan mata pardagingon nasida do pinatujolona. Tung
apala leas rohanasida marnida Tuhan Jesus, ai pintor lao do roha nasida di
among dohot inong ni Tuhan Jesus sian pardagingonna (bnd.ayt.42). Hata on naeng
mandok tu hita, asa porsea huhut tahaposi hataNa, sotung adong hita naso porsea
di Ibana. Ai marhataridaan do ia sian hata na mandok: Nasa na manganhon Roti hangoluan i do na mangolu salelenglelengna. Sandok na so male be
manang na so tupa mauas be, manang ise na porsea di Jesus Kristus,
Roti hangoluan i.
Lapatanna,
ganup na mangulahon angka ulaon lomo ni roha ni Debata, jala manghaporseai
Jesus Kristus na sinuru ni Debata, di nasida do hangoluan salelenglelengna. Ai
Hata ni Debata do hangoluan di angka na porsea i. Jala nunga gabe daging hataNa
i di bagasan Kristus, Sipalua i.
Ay. 56 – 58: Di bagasan hangoluan ni Kristus i do nasa na
manganhon dagingNa dohot mudarNa na sintong i.
Tung tangkas do dihatindanghon di bagasan Bibelta i
paboa Jesus Kristus i do Hata ni Debata na gabe daging (Firman Allah yang
menjadi manusia). Na tuat do Ibana sian banua ginjang laho manobus jolma sian
hadosaonna marhite hamamate dohot haheheonNa ni Kristus. Ganup na manganhon
daging dohot manginum mudarNa i, gabe dapotan haluaon sian Debata. Songon na
pinatupa ni bangso Israel uju di Misir, na mambahen mudar ni anak birubiru
Paska di tohang dohot tiang ni bagas nasida, gabe malua bangso Israel sian
hamamate anak buhabaju. Malua do bangso i sian hamatean ala mudar ni anak birubiru
Paska (2 Musa 12 : 29 – 51). Ai martudutudu tu Tuhanta Jesus Kristus do
saluhutna, Ibana do birubiru ni Debata na paluahon hita di bagasan mudarNa na
badia i.
III.
PANIPULION
1.
Unang adong dihita na mandok dirinta
naung singkop di parninotoan. Nda holan sian Debata
marhite Tuhan Jesus do hasingkopon i, ndada di hita jolma.
2.
Molo Porsea hita di Tuhan Jesus,
ndada hadirion sian hajolmaonNa na laho idaonta. Tung Ibana do Anak Sasada ni
Debata, naung dilehon tu portibi on laho padengganhon dohot padamehon hita jolma
tu Debata, huhut marhite Ibana adong dalanta laho tu hangoluan na saleleng ni
lelengna.
3. Kristus
Jesus i
do Roti
hangoluan di
angka na
porsea i.
Hombar tusi
ingkon tajanghon
do Roti
hangoluan i, asa margogo
hita manghalugahon “solu ni ngolunta”.
4. Unang tapasombu
‘anturaparon’ partondionta. Unang gabe mauas
jala gale tondinta
jala
tarlalap di hasiangan on.
5.
Ingkon do ungkap rohanta
di Hata ni Debata, asa mariaia tondinta
laho mangihuthon Kristus i jala satia hita laho
manghaporseai Ibana.
6.
Manang aha pe na masa di pardalanan ni ngolu on, ingkon Hata ni Debata
do tapangasahon, las ni roha
nang arsak pe.
7.
Asa unang holan sipanganon pamatangta (kebutuhan jasmani)
tapasarisari di hasiangan
on, alai ingkon ma jumolo sipanganon partondion tasarihon.
8.
Taingot hataNa na mandok di Mateus
6 : 33 “Sai jumolo ma lului hamu harajaon ni Debata dohot hatigoranna, dung i
tambahononna do sude angka ondeng tu hamuna!”.
9.
Antong, tajangkon jala tahangoluhon
ma hata ni Debata, roti hangoluanta i, jala sai marparbue na denggan ma i dingolunta, bahen hasangapon jala hamuliaon di goar ni Debata.
Amen!
