MARGOGO DI BAGASAN TUHAN (Psalmen 34 : 16 – 23)
I.
PATUJOLO dohot HATORANGAN NI TURPUK
Huria ni Tuhanta na hinaholongan di bagasan Kristus Jesus Tuhanta!
Ganup do hita mangadopi sitaonon di bagasan parngoluanta tarlumobi di bagasan
parsaoranta siganup ari tu angka donganta. Tung pe sai manghirim hita asa
tongtong di bagasan hadameon laho marsaor tu angka donganta, alai sai adong do
na so lomo roha umbahen gabe olo ma masa parmusuon di bagasan parsaoran i. Molo
nunga adong musu di bagasan parsaoran, tontu gabe adong hamaolon gariada na boi sahat
tu nagabe mengancam hosata
(nyawa kita) songon na diadopi si David. Tung mansai godang do angka haporsuhon
na ingkon diadopi ibana tarlumobi di bagasan parsaoranna na pola dihalomohon
musana i naeng mangago hosana . Naparjolo i ma na dilele raja Saul ibana ala diboto Raja Saul naeng digantihon si David
ibana marhite naung dipasupasu Debata si David. Napaduahon, tarlumobi di
bagasan turpuk on, molo tajaha mamungka sian ayat 1 sahat tu na mangihut,
tarlumobi di Psalmen 34 : 1 na ingkon gabe na lalaen ibana dipaula di jolo ni
Raja Abimelek jala i do na gabe
dipalaho ibana (diusir). Alani ingkon marbisuk do ibana laho paluahon dirina sian angka parmaraan tarlumobi sian
raja Abimelek, i ma musu ni raja
Saul. Suang songoni do di hita,
ra adong do hita
na mangadopi songon na niadopan
si David i ma angka musu na
naeng mangago hosanta.
Huria ni Tuhanta! Dibagasan
turpuk on diboto
si David do molo holan na mangondolhon bisuk na sian portibi
on i ma na gabe bahenonna songon na rintik
ibana di jolo ni Abimelek
jala gabe i do
na paluahon ibana sian parmaraan,
dirajumi ibana do di sada tingki
habotoan do i tu si Abimelek. Na ingkon jumpang dope ibana muse tu si Abimelek,
jala marhite i ma muse dirajumi ibana ia haluaon (keselamatan) na sasintongna holan na sian Debata do. Holan marhite asi ni roha ni Debata do
boi mambahen ibana malua sian parmaraan i.
Ala naung dirajumi
ibana ndang holan marhite bisuk na sian portibi on dohot mangondolhon dirina sandiri, ditogihon do di turpuk on marhite
ende pujian asa tongtong mangondolhon Debata ala diboto si David sai diramoti Debata
do angka partigor
(orang-orang benar). Songondia
do halak partigor na nidok si
David? I ma halak na olo mangulahon angka na denggan jala mangalului hasonangan (ayat
15). Alai ingkon
taingot gabe halak partigor ndang alani gogonta
sandiri, alai ala asi roha ni Debata do. Songon i do na
di jalo si David, ndang alani usaha
ibana sandiri alai ala asi roha ni Debata na tongtong mangaramoti ibana umbahen
malua ibana sian angka parmaraan. Orang yang takut akan Tuhan pasti akan selalu diberkati. Jolma na biar mida Jahowa, manang
aha pe na masa tu bagasan parngoluonna jala mangalualu tu Debata, ingkon
tangihonon ni Debata do jala paluanNa do sian angka hagogotan.
Jadi
marhite sian turpuk on, unang pola mabiar hita molo tung mansai godang ro angka
haporsuhon, parungkilon dohot hagogotan. Molo porsea hita tu Debata jala biar
mida Ibana hita, sai ditangihon jala dipalua Debata
do hita sian saluhutna i. Songon na nialaman ni si David, dipalua
Debata do ibana sian angka
parungkilon, haporsuhon jala hagogotan na naeng mangago hosanna. I do na
mambahen ibana gabe mandok mauliate ibana tu Debata di angka sude pangaramotion
dohot pandonganion ni Debata. Tung pe gabe godang jolma na so lomo rohana
jala na sogo rohana
tu si David, ndang mabiar ibana ala porsea do ibana diramoti Debata do ibana
songon na nidokna di bagasan turpuk on di ayat 22 i ma “Ditobus Jahowa do hosa
ni angka naposoNa, jala ndang marutang sogot sude na marhaposan tu Ibana”. Amen
II.
SIPAHUSORHUSORON
1. Unang pola mabiar hita mangadopi angka hagogotan dohot sitaonon alana ise na porsea jala mabiar tu Jahwa pasti
sai di jaga jala di ramoti Debata
do ibana songon di dok di BE. No. 806 “Aha pe masa dingolumon, Tuhan manjaga
ho”.
2. Tung songon dia pe
ro angka hagogotan di bagasan parngoluonta, saleleng gabe halak na tigor roha
jala biar mida Ibana, tapasahat ma i tu Debata jala pos roha ditangihon do
tangiangnta. Amen.
Post a Comment