1.
Patujolo
Disurat do Buku
Habakuk on di tingki manggomgomi raja Joyakim
ima di taon 609-598 SM, tingki i masa ma parporangan sian raja Nebukadnezar tu Jerusalem (605 SM).
Marhite angka partingkian na sisongoni ma didalani ibana hapanurirangonna marhite
na gok hamaolon. Hamaolon i ndang holan sian duru ni bangso Israel,
alai laos dohot do nang sian bagasan
bangso I sandiri, tarida ma i marhite pangalaho
angka halak na marhuaso/ manggomgomi dilingkungan harajaon raja Joyakim na so tigor marpangalaho. Alai ndang holan angka panggomgomi na so denggan
pangalahona dohot do bangso i naung
sega parrohaonna di adopan ni Debata. Di angka na masa i, gabe godang do na dikritik panurirang
Habakuk taringot tu angka pangalaho
angka na so denggan. Tarlumobi ma pangalaho ni bangso Israel na so olo unduk tu hata ni Debata gabe manghorhon pangalaho pangalaho na jahat sogon gok parsalisian nang angka kekerasan dohot penindasan (Hab. 1:2-4).
Dirajumi panurirang
Habakuk do angka parungkilon ni bangsa Israel
gabe parungkilonna, manang sitaonon ni bangso i gabe sitaonon di ibana songon panurirang na pinabangkit ni
Debata. On ma na gabe bentuk solideritas ibana tu bangso i.
Gabe dialuhon dohot disungkun panurirang
Habakuk tu Debata boasa boi masa angka i di bangso na pinillit Debata, jala boasa diloas Debata bangso i marungkil.
Sai tarpaima do panurirang Habakuk di
alus ni Debata ima na tarsurat di Habakuk
2: 1 – 4. Turpuk on mambaritahon taringot alus ni Tuhan Debata tu panurirang Habakuk uju mangalualu ibana tu Tuhan Debata
taringot tu ragam pangalaho bangso Israel na mangulahon dosa, tarlumobi pangalaho bangso na asing, na gabe musu Israel
di pake Debata laho manguhum nasida.
Dialusi Tuhan do alualu ni panurirang Habakuk,
jala disuru Tuhan asa disurathon pangungkapon na pinatudu ni Debata tu ibana.
2.
Hatorangan ni turpuk
Buku Panurirang Habakuk on pabotohon
tung mansai maol do maralohon hajahaton naung marurat sian
angka panggomgomi sahat tu bangso
Israel na mangulahon ketidakadilan.
Holan tu Debata do panurirang i
mangaluhon saluhut na masa i, dibagasan alualu i, hirim rohana asa pintor dialusi Debata alualuna, asa boi manang aha
na boi diulahon ibanalaho mangadopi angka na masa i (Hab. 1: 2-4). Alus ni Debata tarida ma sian ayat na
mangihut ima na naeng dipahehe Debata
halak Kasdim laho manaluhon torop bangso termasuk ma bangso Israel (Hab.1: 5-11). Dung diida panurirang Habakuk beha pangalaho
ni halak Kasdim i, gabe mulak muse rohana sungkunsungkun tu Debata, boasa diloas Debata halak na jahat i laho
manggomi dohot patupahon ulaon na jahat. Tung dokdok situtu diae bangso na pinillit ni Debata
(Hab.1:12-17). Turpuk on ma na gabe alus ni Debata taringot tu sungkunsungkun panurirang Habakuk marhite pandohan: “anggo halak partigor i mangolu do binahen ni parsihohotna marhaporseaon”,
alai halak parjahat ingkon mate dibagasan hajahatonna.
Adong pigapiga na boi putihonta sian Habakuk 2: 1 – 4 ima:
a.
Manahan paimahon alus sian Debata jala girgir manangihon hataNa.
Tung mansai maol
do halak memiliki kesabaran laho
paimahon alus na mambahen
ponjot rohana. Anggo panurirang Habakuk
sai dipaima dohot dipingkiri rohana do aha na gabe alus ni Debata taringot tu alualuna. Laho paimahon alus
ni Debata, dibaritahon do aha na di ulahon panurirang Habakuk
marhite pandohan : ”manatapnatap
ahu marnida manang aha sidohononNa tu ahu…”,
Ingangan panatapan (menara pengawas)
somalna dibangun mandonokhon tembok kota, laho
mamatamatai molo adong musu na ro, manang molo di porlak (ladang)
dibangun do sada menara inangan
panatapan laho manjaga
suansuanan asa unang ditangko halak manang disegai angka binatang.
Sian inganan panatapan i ma diida panurirang Habakuk saluhut angka na masa di humaliang
Jerusalem. Dipatudos panurirang Habakuk do dirina sogon panjaga/pengawas na paimahon haroro alus
ni Tuhan, jala togu roha ni panurirang Habakuk paimahon partingkian sian Debata.
Sian on diajari do
hita, asa manahan paimahon alus sian Debata diganup
alualu dohot pangidoanta. Nang pe pintor so didok Debata dope alusNa, anggo pangaramotion dohot panoguonNa manongtong do di angka na porsea. Di bagasan na
paimahon i, jotjot do halak muramura
bosan dohot mandele molo pintor so dialusi alualuna, alai panurirang Habakuk, sabar do ibana paimahon
hata na ro sian Debata.
Kesabaran ni panurirang Habakuk paimahon alus sian Debata marparbue marhite alus ni Debata.
Di tingki mangkuling Debata mangalusi
panurirang i, respon ni panurirang i ima tinggil dohot girgir manangihon aha na gabe sinuru Debata ulahonan. Ditogutogu do hita uju pasahathon
pangidoan dohot angka na masa dingolunta
marhite na martangiang, unang ma holan na papuas na dibagasan rohanta hita, alai hita pe sasintongna ringkot do tong manangihon alus ni Debata dibagasan tangiangnta. Martangiang ndang na holan hita na manghatai tu Debata,
alai dohot do hita manangihon hata ni Debata tu hita. Ringkot
do hohom jala unduk rohanta laho manangihon hata ni Debata di bagasan
ngolunta tarlumobi di bagasan tangiangta. Ps. 50:15; 62:9
b.
Hot jala togu tongtong di bagasan panghirimon.
Disuru Tuhan Debata do panurirang Habakuk
laho patoguhon panghirimon ni bangso Israel asa tongtong
marpos ni roha, ai na mangula do Debata ditingkina. Janji ni Debata,
ndang songon janji
ni jolma na sipata mura ndang terealisasi/diulahon (4 Musa 9:5), anggo Tuhan Debata satia do Ibana diangka
bagabagaNa. Diajari Debata do
panurirang Habakuk asa tongtong marpangkirimon, jala disurathon dohot diuhirhon hata ni Debata i, asa tujoloanon boi
diida dohot dijaha torop halak, gabe dapotan
haluaon dohot dipatogu
dibagasan panghirimon tu Tuhan. Dung dialusi Debata sungkunsungkun i, gabe ndang holsoan be panurirang Habakuk.
Dipaboa Debata do naung ditontuhon Tuhan i tingki na pas laho pasauthon bagabagaNa i. Alani i sai togu
ma roha ni bangso Israel asa manahan
paimahon partingkian na sian Debata, jala i ma na gabe panghirimon.
Turpuk on manjou hita ingkon porsea jala manahan
paimahon haroro ni pangurupion sian Tuhan Jahowa laho mangurupi
hita. Pos
ma rohanta, na ro
ma mangira tingki ni Debata laho paluahon dohot mangurupi hita di ragam ni hamaolon i. Ingot ma, molo tatangihon hataNa jumpang ma dame dipingkiranta nang
pe godang sitaonon na ro
dingolunta. Ndang dipaboa Debata tu hita taringot tingki manang masa sadihari ro Debata mangurupi dohot paluahon hita, alai pasti do Ibana ro mangurupi hita. Na dipangido
Debata tu hita ima asa marbenget ni
roha huhut marserep ni roha hita, jala porsea dihata ni Debata. Andorang so ro dope tingkina, marbisuk ma hita mamangke tingkinta marhite mangulahon na dumenggan
tu Jahowa sian nasa gogonta (Mark. 13:35-37; Gal. 6:9).
c.
Halak partigor mangolu dibagasan
haporseaonna.
Di ayat 4,
dipaboa do taringot tu pangaloho ni halak Kasdim marhite hata: “Ida ma na teal do ibana, ndang tigor rohana di
bagasan”. Hata on laho pabotohon, ala adong do gogo ni halak Kasdim,
adong keberhasilan manang
monang marporang gabe menyombongkan diri do
nasida, jala ndang tigor roha nasida. Disaluhut ima gabe boi halak Kasdim mangulahon saluhut lomo ni rohan
so mardongan biar, boi mangago hosa
ni jolma, mambuat arta manang hak ni halak, jala lomo rohana mangida
halak dibagasan haporsukhon. Diangka pangalaho
sisongoni, ndang na gabe hohom Tuhan Debata, ingkon dapotan jea dohot uhum do jolma na marpangalo na so tigor, jala talu marhite hatigoran sian Debata, alai anggo halak na tigor
roha di jou asa tongtong mangolu jala marsihohot di bagasan
haporseaon.
Didok Tuhan Debata
tu panurirang Habakuk marhite hata: ”halak partigor i mangolu do binahen ni parsihohotna marhaporseaon”. Tung mansai maol do diantusi bangso Israel lapatan ni hata on,
ala hatiha i mangadopi ragam hamaolon
dohot hasusaan ngolu nasida. Dirimpu
roha nasida holan na mangulahon rutinitas parugamoon boi malua jala mangolu
nasida. Ringgas do halak Israel
mengulahon ritus ni ugamo na
dipamasa di bangso Israel, alai ndang
songon ringgas diulaon parugamoon i
haringgason nasida manghangoluhon manang
mangulahon hata ni Debata. Haluaon ni jolma ndang cukup holan sian na marsihohot mangulahon ritus ugamo alai ingkon gabe halak partigor jala mangolu dibagasan
haporseaon na marsitutu. Haporseaon i do na mambahen
halak mandapot hangoluan
(Joh.
20:31). Jadi holan
ala haporseaon na togu ido boi mangolu jolma i, alani tapasiding ma angka pangalaho na so denggan, jala
marsihohot ma hita marhaporseaon tu Debata,
asa dapotan hangoluan hita.
3.
Sipahusorhusoron
a. Manahan ma hita
paimahon alus ni tangianta sian Debata, jala
unang ma holan ngolu na pasif paimahon ngolunta, alai rade jala tinggil hita manangihon hata ni Debata.
Ala boi do masa muncul kebosanan
dinapaimahon alus sian Debata, gabe boi di elaela sibolis
dohot hagiot ni daging ngolunta i.
b. Peop ma gomos
panghirimon i, ditingkina dipatulus Tuhan do
angka panghirimonta molo tongtong satia hita dihaporseaon. Molo tung pe sipata lumambat alus ni tangianta, ndang na lupa Debata diangka pangidoanta. Ingot ma,
umbotoan do Debata aha na ringkot dingolunta martimbanghon dirinta.
c. Pos ma rohanta, jala
togu ma haporseaonta, molo halak partigor mangolu do binahen ni haporseaonna. Marsihohot ma hita marhaporseaon tu Debata, jala tapauli parsaoranta tu Debata marhite
tangiang, pamujion, manangihon hataNa, dohot marpangkirimon dibagasan Ibana. Aha pe na masa ingot ma: ”halak
partigor i mangolu
do binahen ni parsihohotna marhaporseaon”.
Post a Comment