Dungo Jala Manongtong Martangiang

Berjaga-jaga dan Berdoa Senantiasa

Lukas 21:25-36

1. Patujolo

Ditaringoti na deba ma joro naung dipajagar dohot batu angka na uli, gabe didok Tuhan Jesus ma, “diida hamu pe i sude, na ro ma angka arina, ndang tinggal di si dua batu martinditindi na so gargaronna. Marnida i disungkun nasida ma Tuhan Jesus, andingan ma masa i jala dia ma tandana. Dipabotohon Jesus ma na adong hamusuon, hagunturon, parporangon, lalo, sahit, haleon nang angka na porsea tartangkup. Didok Jesus pe saluhut na i ndada laho mambibiari alai laho patuguhon asa unang di ihuthon angka parpoda haliluon dohot unang tarsonggot molo masa si songon i.

2. Hatorangan

Angka tanda ay. 25 – ay. 28. Molo marganti musim sian partaonan ngali tu partaonan las sai adong do tanda na nang panghorhonna, isarani molo martunasi punsuni hau ara jala rungkar angka bulungna naung jonok ma partaonan las (Mat. 24:32). Songon pargantian musim na adong tandatanda na songoni do nang haroro ini Tuhan Jesus paduahalihon, adong tandatandana. Di angka jolma, boi do gabe tahutan marnida angka tandatanda na adong, ima di na masa angka tanda di mata ni ari, di bulan dohot di angka bintang pe; jala hapusohan ma angka bangso di tano on jala bobonosan, bahenon ni gasak ni laut i dohot galumbangna. Langitan marsuara suang songoni panggora ni gasak ini laut dohot galumbangna, saluhutna patubegehon suarana patuduhon na adong kekacauan, hasusaan na parir. Bencana marganti pasoring songon gasak ni laut dohot galumbang na margulunggulung manghantam topi pantai, galumbang parjolo nunga mambahen susa ditambai muse

galumbang na mangihut gabe lam tu parirna angka penderitaan. Ndada holan parlangitan, laut dohot galumbangna na patuduhon perobahanna alai suang songoni angka jolma tahutan, mabiar sahat tu na tarhatos.

Jadi angka tanda na masa i manjoloani haroroni Tuhan Jesus paduahalihon na dibagasan huaso dohot hamuliaonNa na pahehehon angka na mate dohot panguhuman ari sogot. Boasa tahutan, mabiar, pola sahat tu na tarhatos? Tahutan ala merasa adong ancaman na mambahen so nyaman be, na masa dohot na naeng masa. Tahutan on boi marpanghorhon di ngolu ni sasahalak, sian sudut kesejahteraan fisik, emosional manang psikologi. Ala ni biarna manang tahutan gabe tarhatos mamereng angka na masa. So ada be panghirimonna ala so rap dohot Tuhan Jesus di angka pardalanan ni ngoluna. Songon hasesega ni Jerusalem boi di ida saluhut humaliang suang songoni tanda ini haroroNa paduahalihon naeng idaon nasida Anak ni Jolma di bagasan huaso dohot hamuliaonNa, na sa jolma marnida ndang adong na tarpodom.

Molo masa angka tandatanda i dirgak ma hamu ala nunga jonok haluaonmuna. Dirgak ma hamu mandok manatap tu Jesus, simalolong na terarah tu Jesus dibagasan haporseaon jala marolopolop ala haluaon nunga jonok, jadi na sa na manghaporseai Jesus dipaimbaru. Sialani do ndang pola be tahutan. Dipahibul ma roha manang fokus ma di hasintongan hata ni Debata na gok huaso asa unang dipalindak, dipalilu angka huaso ini portibion.

Umpama ay. 29-33. Tuhan Jesus baru dope manggombarhon angka tanda ni langitan, gasak ni laut dohot galumbang, kekacauan, hasusaan na bolon, nueang papatarhon umpama na jonok tu lingkungan ima hau ara dohot hau na asing. Di manang piga hali marumpama do Jesus mangajari situan natorop. Marhite umpama i di igil do asa ummara antusan ini situan natorop aha do na didok ni Jesus. Di turpuk on dihatahaon Jesus do sada umpama

taringot tu hau ara dohot hau na asing na gabe parsiajaran, marningot angka tanda di ayat sebelumna. Di ay. 7 adong sungkunsungkun tu Jesus mandok “andigan ma masa i, dia ma tanda na, paboa laho songgop”. Dialusi Jesus angka sungkunsungkun marhite angka tanda na naeng masa. Ido umbahen didok asa jaga laho mangadopi angka na masa, ia anggo tingki na pasti ndang adong na umbotosa alai pasti do ro tingkina. Ia hau ara molo dung martunas patuduhon naung jonok ma partaonan las. Ise nampuna porlak olo ganup tingki, marjomjom pasudahon tingkina mamareso hau ara i? Manang na holan mamareso hau ara ulaonna soada manarihon na asing be di ngoluna? Nampuna porlak hau ara mamastihon dirina sandiri do nampuna porlak, diboto pertumbuhan hau ara, adong sahit na ro mangaroro manang ndang, aha kebutuhan ni hau ara i. Jadi umpama taringot tu hau ara laho manggombarhon asa jaga hita di angka nubuatan naung dipaandar Tuhan Jesus. Hau ara na boi do diparateatehon, bulung na manang parbuena, molo martunas patuduhon naung jonok partaonan las. Songoni ma angka tanda alam semesta portibion na boi ta parateatehon mandok naung jonok harajaon ini Debata. Didok Jesus “Salpu pe sogot langit dohot tano on, anggo hatangki na so tupa salpu”, ia langit dohot tano secara fisik punya keterbatasan, dibatasi ruang dohot waktu. Salpu do saluhutna, ngolunta on pe salpu do ai holan hata ni Debata do na so tupa salpu. Tangkas do ia Hata ini Debata ima diriNa sandiri do (ida. Yoh.1:1); Nasa Surat i, sinihatan ini Debata do (2 Tim.3:16).

Sian sundut tu sundut na manongtong paimaimahon haroroni Tuhan Jesus. Dua ribu taon na salpu dung hamamate ni Tuhan Jesus, dipatupa angka siseanNa dope angka tanda halongangan. Ari tu ari, taon tu taon, sundut tu sundut torop jolma na dipaimbaru marhite hata ni Debata. Alai angka pamarenta na jungkat na mangalele angka na porsea godang na salpu, bahkan pamarenta na berusaha sai mangalele na porsea bahkan manegai gareja salpu do bahkan usaha nasida ndang mampu laho pasohon hata ini Debata, anggo hata ini Debata na so tupa salpu.

Dungo ma hamu ayat 34-36. Jaga hamu ma dirimuna unang sorat rohammuna binahen ini parminumon dohot parmabuhon dohot panarihon di hangoluan on. Sada singotsingot ma on tu angka na porsea boa do pardalanan ni ngolu na siganup ari. Sai adong do na tung mansai sibuk laho mulaulaon, so pola dipingkiringolu partondion, terjebak tu angka hagiothagiot ni portibion, lupa di parsuruon ini Tuhan Jesus. Ragam tantangan, godaan na boi mamboan tu dalan na sala padaohon dirinta sian Tuhan Jesus. Marhite turpuk, dipaingot asa jaga ma rohamuna, dungo ma hamu marlapatan asa manongtong mian dibagasan kewaspadaan, hati-hati, bersiap-siap, roha na manongtong satia tu Tuhan Jesus. Sian dia gogo asa boi dungo? Ima marhite na melatih diri martangiang, jala marsihohot martangiang, marparsaoran dohot Tuhan Jesus. Kalimat na mandok jaga ma dirimuna, dungo ma hamu marastuan tu panjagaion diri asa unang madabu tu angka hagiot ni portibion, isarani pesta pora na jumpang di si parminumon, parmabuhon dohot tarihot tu hagiot ini portibion. Marhite on ma ngolu ini halak na porsea tongtong dipaingot asa dungo, sadihari pe, manang didia pe, andigan pe tongtong ma dungo. Dungo ma hamu tongtong mardongan tangiang, asa margogo pasiding angka na roa jala hot, togu jonjong manjangkon haroro ni Tuhan Jesus. Tongtong martangiang patuduhon hasatiaon mangihuthon Tuhan Jesus. Antong satia ma manjaga diri jala manongtong martangiang.

3. Sipahusorhusoron

Masa Advent ima tingki na une laho pahusorhusorhon di bagasan roha haroroni Tuhan Jesus dibagasan huaso dohot hamuliaonNa na laho manguhumi na mangolu dohot na mate. Di masa Advent on merenungkon angka tanda na masa dohot na naeng masa ndada alasan laho gabe mandele manang gabe mandao sian Tuhan Jesus. Alai laho patoguhon panghirimon ai hata ni Debata ndang laho salpu, diramoti, didongani do hita. Advent manomunomu paingothon asa tontong marsihohot di Jesus manang aha pe na masa, manang ragam dia pe dibolus las ni roha manang arsak ni

roha. Advent paingothon hita saluhut asa cerdas secara rohani laho menyikapi angka na masa nang pe so taboto pasti na manang sadihari tingkini. Advent na ro ma Tuhan i, antong tagam ma.

Aha do na boi putihan sian turpuk on? Didok jaga ma hamu, dungo ma hamu (ay. 34) manongtong martangiang (ay. 36). Jaga ma unang tarpodom, unang terpengaruh tu angka na masa di portibion, alai marsihot ma di tangiang na mangalehon gogo di ganup na porsea (ida BE 487).

Di advent na parjolo on huhut marningot ari HIV/AIDS sedunia, na paingothon hita lao manghaholongi angka dongan na hurang diparateatehon songon tanda na marsihohot manomunomu Jesus. Di hurianta adong do lembaga HIV/AIDS na fokus mendampingi, mangurupi Orang dengan HIV/AIDS (ODHA), na sai tongtong mangalehon angka paarbinotoan taringot tu HIV/AIDS on ala sai jumpang dope hamaolon manjalo ODHA on ala dianggap dope sahit na sumalin. Manongtong ma martangiang anggiat ODHA mandapot hak na di tongatonga ni masyarakat.