Khotbah Pesta I Hatutubu ni Tuhan Jesus, 25 Desember 2024 - Mundosaragi

 Manomba Jesus Anak ni Debata

Menyembah Yesus Anak Allah

Heber 1:5-12

1.      Patujolo

Ndang apala tangkas ise panurat di Buku Heber on, alai tinujuna i ma Kristen Jahudi. Ai tartait mulak rohanasida manadingkon Huria, mulak tu hajahudion. Sialana, deba ala ni sisolhot na denganna be, na so manolopi, gariada naeng unsat angka parjambaran di parsolhotonnasida be, songon i dohot angka siteanonnasida sian natorasna. Ndang adong do pe bagas papunguan ni Kristen, hape ditadingkon nasida angka sinagoge na denggan inganan pamujian tu Jahowa. Jala ndang apala torop do pe di angka punguan ni Kristen marimbangkon di sinagoge. Na deba, ndang pintor boi songon sangap ni nasida di hajahudion hian do pe hasangaponna di Kristen (pat Ul 6:7 angka malim pe, torop do mangoloi porsea).

Hinorhon ni i, diondolhon panurat mi buku on do, halobian manaang hatimboon ni Jesus Kristus sian saluhut. Di bindu 1-2, bagian ni jamita on, dipatorang do halobian Jesus Kristus sian sude surururuan, ai so na debata nasida. Ndang na patut sisombaonnasida, jala ndang hea didok Debata asa marsomba tu Surusuruan. Laos didok, marhite Jesus Kristus, ro do Debata mangkatai tu hita jolma (ay. 1-4).

2.      Hasurungan ni Anak i

Dipungka do pandohan “tu sururuan dia ma hea didok: na anak ni Debata nasida. Dihaporseai Judaisme do tutu, na timbo hajongjongan ni surusuruan. Alai marhite na dienet Panurat Heber, angka pandohan di Padan na Robi, dipatutuhon do ⁽¹⁾manuju tu Jesus Kristus do angka pandohan na ni Padan na Robi, ⁽²⁾angka pandohan na nienet di hatorangan ni Panurat

Heber, ndada sian angka panurirang, alai sian Debata do,

⁽³⁾pataridahon haiseon ni Mesias (Jesus) do angka pandohan i.

Di Padan na Robi, dipake do pandohan Anak tu Mesisas i jala tu Debata didok Ama. Pandohan na di ayat 5 ni turpuk on, na dienet sian 2 Samuel 7:14; Psalm 2:7 do i, Debata do na mandok “AnakKu do Ho, sadarion do Ho hutubuhon”. Jala di hatutubu ni Anak i, ingkon marsomba do angka sursuruan tu Ibana. (Psalm 97:7; Rom. 8:20). Laos didok muse di ayat 7, na jinadihon do surusuruan na boi dipaubaon ni Debata do i gabe api hombar tu lomo ni roha ni na manompada (Psalm 104:4). Asa, na tinompa do surusuruan i. Jala ulaonna pe laho marhobasi do. Alai ianggo Jesus Kristus i, ndada na Tinompa, marhite Ibana do ditompa saluhut, jala laho mangarajai do Ibana, jala ndada marombas, manang mubauba, alai ro di salelenglelengna do habangsaNa.

Dipangkas muse, na mangarajai di bagasan hatigoran do Ibana (ay. 8), marasing sian angka pangarajai na somal. Tanda ni pangarajaion, manang habangsa-Na, marojahan di “… hatigoran jala dihagigihon Ho do hajahaton”. Manghagigihon hajahaton, andul marasing siang angka pangarajai na somal, ia so na langsung mangulahon hajahaton pe, alai sai jonok jala olo tarela tu hajahaton. Alai Jesus ndang olo jonok, manang dais tu hajahaton. Tumagon pasaehaon hajahaton do Ibana.

Gabe dimiahi do Debata do dohot “miak halalas ni roha”, na sumurung sian nasa na pinabangkit ni Debata. (ay. 9). Na patangkashon hababangkit ni Jesus gabe raja na na sumurung i do tinuju ni pandohan on.

Di bagian parpudi ni turpuk jamita on (ay. 10-12), sian Psalm 102:26-28. Dipatuduhon do paboa ndada na tinompa Jesus i, alai panompa do Ibana. Mago do angka na tinompa i muse, buruk do i songon ulos, alai Ibana, hot do marhuaso. Laos disimpuli ma di ayat 13-14, ia Jesus dipahundul do tu siamun di Debata, mando marhuaso jala Raja jala di si sahat tu na dipatunduk sude tu toru ni pat-Na (Psalm 110:1), jala angka surusuruan marhobasi

mangurupi angka sitean haluaon. Jadi laos sihobasi angka naung pinalua ni Kristus do angka surusuruan i.

Nunga jotjot jala godang ragam dibahen Debata mamangkuli jolma, alai na parpudi marhite sian Anak i do, i ma Jesus Kristus. Andul sumurung do haroro ni Debata marhite Anak-Na i, sian marhite angka panurirang nang surusuruan. Siala ni i, na patut marsingang marsomba do surusuran i tu Ibana.

3.      Manomba Jesus, Anak ni Debata

Joujou manomba Jesus, anak ni Debata mansai ampit do di partingkian on. Alana sai mehet do na papeol angka pangantusion, mandok boha do maranak Debata. Hape haanahon, ndada pikiran (konsep) pardagingon i. Dipaandar panurat Heber do marhite angka pandohan naung tinanda di Padan na Robi, tinuju ni pandohan Anak, i ma haroro ni Debata marhite Mesias patolhashon haluaon tu jolma, ala so marnamehon hajolmaon marhite pamangkulingion-Na sian angka panurirang nang angka surusuruan.

Tung ampit do joujou ni turpuk jamita on lumobi di tonga ni partingkian na mura mubauba on. Mura do tartait roha ni jolma tu angka huaso na asing. Ragat do muse, na gabe mardebata tu teknologi ala didok boi mangalusi ragam hamaolon. Dipardebata do deba nang dirina, ai didok dirinta do hinsu ni sude ngoluniba. Angka nasida on ma na targoar Ateisme nuaeng on. Ndanga adong debata di atas ni hita on. Hita do mangatur dirinta be. Laos songon i muse dohot na mandok ndang mananda/mamboto adong Debata, digoari Agnotisme. Angka nasida on ma na sumurut sian Debata na tutu, na so olo marsomba tu Jesus Kristus.

Marhite jamita on dipaingothon do, tumimbo do Jesus sian angka na asing na pinatandahon ni portibion, songon i nang angka surusuruan na tinanda ni hajahudion. Ra, deba sahat tu nuaeng pe sai adong do na patimbotimbohon hajongjongan ni surususuruan i di bagasan haporseanna be. Alai togo jala torang dipaingothon, tumimbo do Jesus Kristus sian i. Na patut marsomba do angka

surusuruan i. jala nunga dipatuduhon angka surusuruan i di tingki hatutubu ni Jesus di Betelehem na jolo i. Laos songon i do pe ulaonna sahat ro di ujungna, songon na pinatuduhon ni Buku Pangungkapon i.

Laos taingot do, ndang holang sian hatutubu ni Jesus, manigor ro do angka Parroha si Purba (majus – astrolog?) sian harajaon Media – Persia Kuno, sian angka na pistar ni portibi on sian huta na dao, manomba Yesus Kristus, na didoknasida “Raja na Baru Tubu”, na tarida bintang-Na di Habinsaran (Mat 2:2). Marsomba huhut pasahathon parsombaonnasida. Angka na arga muse do i disombahon nasida.

Alai ndang holan di hatutubu-Na i ro parsombaon i. Di tingki pangulaon-Na di portibi on, torop do na ro marsomba tu Ibana. Dung i muse dirimpun Apostel Paulus do mandok, “… asa somba tu Goar ni Jesus nasa ulu ni tot, na di banua ginjang i dohot na di tano, nang na ditoru ni tano, jala asa nasa na marsoara marhatopothon: Jesus Kristus do Tuhan, bahen hasangapon ni Debata Ama!” (Fil 2:10-11).

Rimpunna, tu hita na marpesta parningotan hatutubu ni Jesus i. Somba ma rohanta di adopanNa. Angka pelean na marguna tu hamuliaonNa ma tasombahon. Laos tingot ma torop nari si jouon, sungulanta asa ro, na deba asa mulak marsomba tu Jesus Kristus, Anak ni Debata, na sumurung sian saluhutna. Amen.